T牌提早玩完: 運輸署杜絕濫用試車牌 (轉文)

By admin, June 21, 2012 11:32 am

早 2星期收到封運輸署嘅信,以前好少見過個信封會咁大咁厚,都知唔會有好嘢。打開一睇,原來係有關試車牌嘅新法例。以前試車牌因為印上紅色字同有個紅色套, 所以俗稱「紅牌」,不過將來就會多一個「藍牌」,係專為左軚試車而設,話就話方便道路使用者同執法者識別,但其實好明顯係針對啲玩天價左軚超級跑車嘅有錢 人。

因為有唔少有錢人使幾百萬買部超級跑車返嚟,只係間中星 期日朝早揸吓去 morning drive,好多時玩幾百公里就賣,費事出牌打百幾二百萬稅,所以好多都會自己開間貿易公司做買賣車,申請個試車牌有需要時掛上車揸去玩,但以後相信就冇 呢支歌仔唱嘞!因為開公司申請藍牌嘅要求更加嚴謹,就算申請到,掛上車用嘅限制更多,總之就係搞到你唔係幾時想用就用到。我哋公司一向冇搞開左軚車,所以 都冇詳細睇藍牌啲例,但我哋用開嘅紅牌一樣有更嚴格嘅規範化,首先要登記晒公司會用紅牌員工嘅資料上報,唔喺名單內嘅人用就冇保險同犯法,之後每次出車都 要帶成 file文件,寫明邊個揸、邊個試、路線、時間……水蛇春咁長嘅資料,一有警察查牌就要即時攞出嚟,唔係分分鐘即時「搣牌」,以後連紅牌都冇得用!

不過咁搞都有辣有唔辣嘅,因為以前好多行家都會問我哋借紅牌用,總之掛住就好似包冇衰咁,我哋有時都唔好意思婉拒。不過出咗新例之後就可以大條道理唔借,因為出事唔只累到自己俾人搣牌,借嚟用嗰個都犯法㗎!

- 文定祥

One Response to “T牌提早玩完: 運輸署杜絕濫用試車牌 (轉文)”

  1. Eric says:

    點解我見到有d車有車牌仲要掛住個T牌?
    但係又唔係二手車

Leave a Reply